Ag laghdú astaíochtaí, ag méadú bithéagsúlachta

Tá Dingle Surf ag tacú le pobal surfála agus snámha an Daingin ón mbliain 2001, agus mar gheall ar a bpaisean don aigéan, táid an-aireach faoin ngá atá ann é a chosaint. Mar thoradh air sin, bíonn siad i gcónaí ag lorg slite chun an plaisteach ina ngnólacht a laghdú, idir rollaí scipéid gan aon lár plaisteach a roghnú agus plugaí cluaise a stocáil atá déanta as plaisteach aigéin athchúrsáilte ar fad geall leis chomh maith le sileacón athearraíochta.

Mar gheall ar COP an Daingin, gheall siad go gcuirfidís deireadh ar fad de réir a chéile le cultacha fliucha neipréine atá bunaithe ar pheitriliam agus cultacha fliucha C-Skins a chur ina n-áit, cultacha fliucha is ea iad sin a dhéantar as neipréin rubair nádúrtha phlandabhunaithe go bhfuil líneáil mogaill athchúrsáilte laistigh díobh. Tosnaíonn céim a haon le cultacha fliucha ardchaighdeáin, atá sna siopaí an tseachtain seo, agus tá siad díreach in am do spriocdháta COP an Daingin mhí na Samhna. Faigh tuilleadh eolais faoi chultacha fliucha C-Skins anseo.

Ar cheann de na gailearaithe is ildaite agus is fairsinge sa Daingean, tá Dingle Artworks ar Shráid an Doirín lán d’ealaín úrnua, priontaí, féilirí, leabhair agus cártaí beannachta.

Gheall siad bogadh ó mhálaí plaisteacha dá gcártaí beannachta agus athrú chuig coimeádáin páipéir a úsáid ina n-ionad.

Tá an scoil chónaithe stairiúil, Coláiste Íde, tiomanta chun tacú le bithéagsúlacht áitiúil. Clúdaíonn tailte na scoile achar de 107 acra, agus is coillte iad 57 acra dóibh sin.

Tá gealltanas tugtha ag Coláiste Íde plocóidí plandaí don bhfásra dúchasach a bhailiú agus iad a athphlandáil in áiteanna eile ar a gcuid talún, síolta bláthanna fiáine dúchasacha a chur, agus a réimeas bainte féir a athrú.

Tá ionadaí ón gComhaontas Glas ar an bhfoireann ag Clinic Cois Abhann agus mar sin bhí a fhios againn go mbeadh a ngealltanas go maith! Tá gairdín fiáin acu cheana féin ina bhfuil crainn dhúchasacha nua-phlandaithe, úsáideann siad táirgí glantacháin nach ndéanann díobháil don éiceolaíocht agus seachnaíonn siad cuimiltí glantacháin aonúsáide nuair is féidir, laghdaíonn siad dramhaíl trína gcuid soláthairtí leighis a roinnt le clinicí eile chun a chinntiú go bhfuil siad ídithe sara dtéann siad ó mhaith, baineann siad leas as an scéim rothar-chun-oibre, spreagann siad othair chun am a chaitheamh leis an dúlra mar chuid dá n-aistear sláinte, agus úsáid a bhaint as cógais atá neamhdhíobhálach don chomhshaol (amhail análóirí) nuair is féidir.